Þá er komið að sumarlokuninni á Bakka. Nú verða allir í sumarfríi næstkomandi 2 vikur. Leikskólinn opnar aftur þriðjudaginn 3.ágúst og þá munu börn og starfsmenn fara að streyma inn úr fríi smátt og smátt út ágúst. Frá og með 10.ágúst fara ný Bakkabörn að bætast í hópinn.

Jæja, nú erum við fáliðuð á Bakka, meirihluti barna og starfsmanna er í sumarfríi og elsti árgangurinn að kveðja okkur.

Á föstudaginn komu til okkar elstu börnin frá Engjaborg og fóru með okkur í fjöruna.

Við fengum heimsókn frá leikskólanum Furugrund í Kópavogi. Þau fóru með 2005 árganginum í fjöruferð og kíktu svo inn til okkar og borðuðu nestið sitt. Þau komu færandi hendi og gáfu okkur fuglagjöf. Við vorum mjög heppin með veður og sáum 5 seli, mjög mikið af fuglum og kíktum á krummahreiðrið á leiðinni heim úr fjörunni. Við ætlum síðan að heimsækja þau næsta vor og fara með þeim í skógarferð í Fossvogsdalnum.

Í beinu framhaldi af sumargleði leikskólans var sumargleði Foreldrafélagsins Bakka. Sólin lék þá á alls oddi og nutu bæði börn og foreldrar veðurblíðunnar við spjall og leiki.

Mjög spennandi gestir kíktu í heimsókn, Solla stirða og Íþróttaálfurinn. Þau vöktu mikla gleði og kátínu, enda gáfu þeir sér góðan tíma í leik og sprell með börnunum.