Það tóku allir til hendinni, jafn stórir sem smáir. Garðurinn var sópaður og ruslið týnt. 

Formleg útskrift elstu barnanna var í gær hjá okkur. Börnin fengu afhent viðurkenningaskjal, verkefnin sem þau hafa unnið í vetur ásamt ýmsu öðru. Síðan var slegið upp veislu. Farið var í ýmsa leiki og dansað, þetta var mikið fjör og virkilega skemmtilegt.

Í lokin fengum við okkur vöfflur með rjóma, sem smökkuðust mjög vel.

Á miðvikudaginn fóru elstu börnin í útskriftaferð. Við heimsóttum leikskólann Furugrund í Kópavogi. Fjóla og stelpurnar frá Furugrund voru svo elskulegar að taka móti okkur hjá strætóstoppistöðinni við Grímsbæ og gengum við síðan niður Fossvogsdalinn. Þau fóru með okkur í skóginn þeirra og þar biðu strákarnir og tveir kennarar frá Furugrund. Það var mikil ánægja hjá börnunum þegar þau sáu Nönnu sem var nemi hér hjá okkur hér á Bakka.

Síðastliðinn föstudag var lokatíminn í eTwinning. Við erum búin að gera margt og læra í vetur, enda flottir krakkar á ferð.

Börnin fengu að ráða hvað við myndum gera í síðasta tímanum. Þau völdu að fara í leiki eins og gettu hver ég er. Einnig fórum við út í vatnsblöðrukast og gerðum tilraun með diet coke og mentos.

Tveir elstu árgangarnir fóru í fjöruferðir í sandfjöruna í vikunni sem leið. Þetta er síðasta ferðin fyrir útskrift og sumarfrí.

Elstu fjörulallarnir verða þó með tvö fjörulallanámskeið í júní.